බන්ධනාගාරගතවන රැඳවියන්ගේ පුනරුත්ථාපන ක්‍රියාවලියට මහත් රුකුලක් වන බන්ධනාගාර බාලදක්ෂ කටයුතු සදහා වසර සියයක් සපිරෙන මොහොතේ බන්ධනාගාර කොමසාරිස් ජනරාල් තුෂාර උපුල්දෙණිය මහතාගේ උපදෙස් මත අතිරේක බන්ධනාගාර කොමසාරිස් ජනරාල් චන්දන ඒකනායක මහතාගේ අධීක්ෂණය යටතේ බන්ධනාගාර දෙපාර්මේන්තුවේ පුනරුත්ථාපන අංශය විසින් සංවිධානය කරනු ලැබූ හතරවන නේවාසික මානවක බාලදක්ෂ කඳවුර 2023.04.01 සිට 2023.04.03 වන දින දක්වා පල්ලෙකැලේ එළිමහන් සිර කඳවුරු භූමියේදී පවත්වන ලදී.
මෙම කඳවුර බන්ධනාගාරගත නේවාසිකයින් 400 ක් හා බාලදක්ෂ ආචාර්යවරු 100 කට අධික පිරිසකගේ සහභාගීත්වයෙන් සිදු කරන ලදී. කඳවුරු සමාරම්භක උත්සවයේ ප්‍රධාන ආරාධිත අමුත්තා ලෙස අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ ගරු අමාත්‍ය ජනාධිපති නීතිඥ (ආචාර්ය) විජයදාස රාජපක්ෂ මහතා හා ගරු අධිකරණ හා බන්ධනාගාර කටයුතු රාජ්‍ය අමාත්‍ය අධි නීතීඥ අනුරාධ ජයරත්න මහතා ද සහභාගී විය.
අධිකරණ හා බන්ධනාගාර කටයුතු අමාත්‍යංශයේ ලේකම් වසන්තා පෙරේරා මහත්මිය, බන්ධනාගාර කොමසාරිස් ජනරාල් තුෂාර උපුල්දෙණිය මහතා, අතිරේක බන්ධනාගාර කොමසාරිස් ජනරාල් චන්දන ඒකනායක මහතා, බන්ධනාගාර කොමසාරිස් (මෙහෙයුම් හා බුද්ධි) ටී.අයි.උඩුවර මහතා, බන්ධනාගාර කොමසාරිස් (සැපයුම් හා සේවා,කර්මාන්ත) කේ.ඒ.එස්. කොඩිතුවක්කු මහතා, ශ්‍රී ලංකා බාලදක්ෂ සංගමයේ නියෝජ්‍ය ප්‍රධාන කොමසාරිස් එම්.එෆ්.එස් මූහීඩ් මහතා සහ මහනුවර දිස්ත්‍රික් බාලදක්ෂ කොමසාරිස් කපිල ප්‍රියන්ත මහතා ඇතුළු බන්ධනාගාර ජ්‍යෙෂ්ඨ නිලධාරීන් හා සම්භාවනීය අමුත්තන් රැසක් සහභාගී වූහ.
පුරා දින තුනක් පල්ලෙකැලේ එළිමහන් සිර කඳවුරේ මනරම් භූමි භාගයක පැවති මෙම කදවුරේ දී මානවක බාලදක්ෂයින් හට සංස්කෘතික සංදර්ශන, ගිණිමැල සංදර්ශන, බාලදක්ෂ ක්‍රියාකාරකම්, අධ්‍යන චාරිකා, ප්‍රජා සේවා ව්‍යාපෘති වැනි ක්‍රියාකාරකම් රැසකට සහභාගී වීමට අවස්ථාව උදා විය.
මෙම කදවුර සදහා ශ්‍රී ලංකාවේ සියළුම බන්ධනාගාරයන් නියෝජනය කරමින් බාලදක්ෂ මානවකයින් සම්බන්ධ වීම සුවිශේෂී කරුණක් විය. කඳවුරේ දී පැවති පරික්ෂණයන්ට සාරථකව මුහුන දී දක්ෂතම බාලදක්ෂ සමූහය ලෙස තල්දෙන තරුණ වරදකරුවන්නේ විශෝධන මධ්‍යස්ථාන කණ්ඩායම බන්ධනාගාර කොමසාරිස් ජනරාල් ශූරතාවය දිනා ගන්නා ලදි. අතිරේක බන්ධනාගාර කොමසාරිස් ජනරාල් අනුශූරතාවය බූස්ස බන්ධනාගාර රැදවියන් විසින් දිනා ගන්නා ලදි. මෙම කදවුරේ දී බන්ධනාගාර රැදවියන් තම කලා හැකියාව උපරිම ලෙස යොදාගනිමින් ඉදිරිපත් කල අංගයන් සෑම දෙනෙකුගේම ඇගයීමට ලක්විය.
මෙහි සමාප්තිය අතිරේක බන්ධනාගාර කොමසාරිස් ජනරාල් චන්දන ඒකනායක මහතාගේ සහභාගීත්වයෙන් පල්ලෙකැලේ එළිමහන් සිරකඳවුරේදී 2023.04.03 වන දින සාර්ථකව පැවැත්විය.
